Vill stoppa þorskniðurskurð og veiða 220 þúsund tonn árlega

Guðjón Arnar Kristjánsson formaður Frjálslyndaflokksins sagði í ræðu á fundi Landsráðs flokksins á Laugavatni í morgun að nú þyrfti að segja stopp við þorskaflaniðurskurði ríkisstjórnarinnar.

Allt stefnir í að hámarksafli á þorski verði 130 þúsund tonn á næsta fiskveiðiári, annað fiskveiðiárið í röð, eftir að Hafrannsóknarstofnunin kynnti mat sitt á stofninum á dögunum. Guðjón Arnar segir það minnsta þorskafla á Íslandsmiðum í 98 ár.

Hann leggur til að heimilað verði að veiða 220 þúsund tonn á hverju fiskveiðiári næstu þrjú árin og eftir það verði árangurinn metinn. Guðjón Arnar spáir því að hann verði betri en árangurinn af fiskveiðistjórnuninni frá því kvótakerfið kom til sögunnar árið 1984.

Á þessum þremur árum verði öll leiga og sala á kvóta milli útgerða bönnuð og lög sett um að ríki og sveitarfélög megi ein leigja kvóta til útgerðar.

Þá útfærir formaðurinn nánar hvernig þessum 220 þúsund tonnum verði skipt milli aflahlutdeildarkerfisins, byggðapotts og línuívilnunar. Meðal annars verði 40 þúsund tonn boðin upp af ríkissjóði og sveitarfélögum, sem skiptist með ákveðnum hætti milli ákveðinna tegunda skipa og byggðarlaga.

Þá leggur formaður Frjálslynda flokksins til að loðnuveiðar verði bannaðar næstu tvö árin, nema ef veiðistofninn mælist yfir 800 þúsund tonnum.

Guðjón Arnar segir nóg komið af því sem hann kallar pólitíska fiskifræði og stjórnarstefnu um samþjöppun veiðiheimilda á fáar hendur, sem Sjálfstæðisflokkurinn hafi fengið að ráða síðast liðinn 17 ár.