Innlent

Á spítala eftir að hafa fengið í sig straum í álveri Alcoa

Frá álveri Alcoa Fjarðaáls.
Frá álveri Alcoa Fjarðaáls. MYND/GVA

Starfsmaður í álveri Alcoa Fjarðaáls liggur nú á Landspítalanum eftir að hann fékk í sig rafstraum við vinnu sína í kerskála álversins í þarsíðustu viku.

 

Í tilkynningu frá félaginu kemur fram að maðurinn hafi verið fluttur á Fjórðungssjúkrahúsið í Neskaupsstað en útskrifaður þaðan daginn eftir og talinn ómeiddur. Helgina eftir fór hann hins vegar að finna til óþæginda og fór til Reykjavíkur þar sem hann var lagður inn á Landspítalann á sunnudeginum. Verið er að rannsaka meiðsli hans og útlit er fyrir að þau séu alvarlegri en á horfðist í fyrstu.

 

,,Maðurinn vinnur í álverinu fyrir Vélaverkstæði Hjalta Einarssonar, undirverktaka Fjarðaáls. Hann var að vinna við mælingar í keri í álverinu þegar slysið varð en öllu jöfnu er það álitið hættulaust starf. Ástæða slyssins var leyndur galli á frágangi rafmagns í kerskála. Búið er að lagfæra gallann til að tryggja að slys eins og þetta endurtaki sig ekki. Vinnueftirliti ríkisins hefur verið tilkynnt um atburðinn.

 

 

Fyrirtækin líta slysið alvarlegum augum enda eru öryggismál í öndvegi hjá Alcoa Fjarðaáli og markmiðið slysalaus vinnustaður," segir í tilkynningu Alcoa.

Mest lesið


Fleiri fréttir

Sjá meira


×

Mest lesið