Deilt um skattamál á þingi

Deilt var um það á Alþingi í dag hvort skattalækkanir til handa fyrirtækjum eða almenningi væri mikilvægari nú um stundir. Sjálfstæðismenn og framsóknarmenn gagnrýndu vinstri - græna um að vilja aldrei lækka skatta en formaður Vinstri - grænna sagði að svigrúm ætti að nýta til þess að draga úr skattbyrði lágtekjufólks.

Birgir Ármansson, þingmaður Sjálfstæðisflokksins, kvaddi sér hljóðs undir liðnum störf þingsins og vildi ræða þau áform ríkisstjórnarinnar að lækka skatta á lögaðila úr 18 prósentum í 15. Vísaði hann til nýútkominnar bókar, Skattalækkanir til kjarabóta, þar sem fjölmargir innlendir og erlendir fræðimenn fjölluðu um skattmál. Þar kæmi fram að lækkun skatta væri fólki og fyrirtækjum til hagsbóta.

Sagði hann vinstri - græna hins vegar hafa allt á hornum sér og saka menn um þjónkun við auðvaldið. Sagði hann það athyglisvert í ljósi þess að mikilvægt væri að atvinnulífið fengi jákvæð skilaboð um þessar mundir. Spurði hann Steingrím J. Sigfússon, formann Vinstri - grænna, um það hvort það væri ekki rétt skilið að flokkurinn legðist eindregið gegn því að lækka skatta á fyrirtæki og hvort hann vildi ekki hækka fjármagnstekjuskatt.

Vinstrihreyfingin - grænt framboð ekki nýfrjálshyggjuflokkur

Steingrímur svaraði því til að menn ættu kannski að velta fyrir sér hvers vegna verið væri að ræða neyðarráðstafanir í efnhagsmálum og skrifa um það langar greinar í blöð. Vinstri - græn hefðu ekki hagað hagstjórn þannig að grípa þyrfti að til neyðarráðstafana.

Vinstri - græn teldu að svigrúm ætti að nýta þannig að það gagnaðist lágtekjufólki. Það hefði fengið auknar skattbyrðar því skattleysismörk hefðu ekki fylgt launaþróun. Þar vantaði enn tugi þúsunda upp á. Þá sagði hann rétt að Vg vildi 14 prósent fjármagnstekjuskatt í stað tíu prósenta en slíkur skattur væri enn með því lægsta sem þekktist þrátt fyrir slíkar hækkanir. Þá sagði hann Vinstri - græn ekki nýfrjálshyggjulfokk ef þingmaðurinn hefði ekki tekið eftir því.

Sigurður Kári Kristjánsson, þingmaður Sjálfstæðisflokksins, tók undir með Birgi Ármanssyni og sagði virta fræðimenn hafa komist að því í áðurnefndri bók að lágir skattar hefðu í för með sér meiri ábata fyrir fólk og fyrirtæki. Sagði hann Steingrím geta reynt að gera lítið úr þeim en hann gæti ekki dregið niðurstöðurnar í efa. Menn hlytu að fagna því að ríkisstjórnin lækkaði tekjuskatt og vonast eftir að þetta væri aðeins fyrsta skrefið í skattalækkunum. Hin nýútkomna bók ætti að vera skyldulesning fyrir vinstri - græna.

Velferðarhalli í þjóðfélaginu

Jón Magnússon, þingmaður Frjálslynda flokksins, sagði spurninguna snúast um forgangsröðun í skattamálum. Það yrði að jafna þann velferðarhalla sem væri í þjóðfélaginu. Auknar skattbyrðar hefðu lagst á lágtekjufólk og frjálslyndir vildu að skattleysismörk fyrir láglaunafólk færu upp í 150 þúsund. Ríkisstjórnin hefði ákveðið að lækka skatta á fyrirtæki til að niðurgreiða kjarasamninga en það yrði að gera jafnt við fólk og lækka skatta hjá þeim sem mest þyrftu á því að halda.

Magnús Stefánsson, þingmaður Framsóknarflokksins, fagnaði áformum ríkisstjórnarinnar um skattalækkanir. Benti hann á að öflugt og framsækið atvinnulíf væri forsenda góðs velferðarkerfis. Íslenskt atvinnulíf yrði að vera samkeppnishæft og koma yrði í veg fyrir flutning fyrirtækja úr landi. Það væri mikið hagsmunamál fyrir atvinnustigið í landinu og starfsfólk fyrirtækja að þau hefðu gott starfsumhverfi. Benti hann á reynsluna af síðustu tekjuskattslækkun stjórnvalda, þá hefðu tekjur ríkisins aukist til muna.

Helgi Hjörvar, þingmaður Samfylkingar, sagði mikilvægt að ríkisstjórnin hefði lýst því yfir að farið yrði í að hækka persónuafsláttinn í tengslum við nýgerða kjarasamninga. Benti hann á að skatta- og bótakerfið hefði ekki verið nýtt nógu vel til að hjálpa fjölskyldufólki og hinum efnaminni og við því væri nú brugðist meðal annars með hærri persónuafslættr og hækkun skerðingarmarka barnabóta.

Þá sagði hann ekki hægt að halda áfram að lækka skatta fyrr en vextir lækkuðu og mikilvægt væri að vaxtalækkunarferli Seðlabankans færi að hefjast.