Palestínumennirnir koma fyrir miðjan september til Akraness

Undirbúningur er nú á lokastigi fyrir komu hinna 29 palestínsku flóttamanna til Akranesskaupstaðar. Ekki er komin nákvæm dagsetning fyrir komu þeirra en verður það í allra síðasta lagi um miðjan september að sögn Lindu Björk Guðrúnardóttur verkefnastjóri vegna komu flóttamannanna.

Undirbúningurinn hefur gengið vel samkvæmt Lindu en til margs er að gæta. „Við erum komin með allar íbúðir og eru þær allar að verða tilbúnar. Rauða kross deildin hér á Akranesi er að vinna að því að setja inn húsgögn og gera allt klárt. Við erum búin að fá þá alla hluti sem okkur vantar, húsgögn, rúm og rafmagnstæki. Síðan er einnig verið að vinna að samningum um fræðslumál þessa dagana," segir Linda.

Að sögn Lindu eru flóttamennirnir öll arabískumælandi en kunna latneskt letur sem auðveldar mjög íslenskukennsluna. Þau koma með til að vinna með túlk sem ráðinn er í þetta verkefni.

„Ferð þeirra til Íslands gengur þannig fyrir sig að Flóttamannastofnun Sameinuðu þjóðanna sér um að þessi hópur fái leyfi til að koma til Íslands. Síðan er stofnun sem heitir „International Organization of Migration" sem sér um allan flutning á fólkinu. Þar sem þessir einstaklingar eru með flóttamannastöðu fá þeir leyfi til að ferðast frá Írak til Íslands en aðeins þessa ferð og þurfa þau fara í fylgd með fulltrúa frá þessum samtökum," segir Linda að lokum.