Fréttastofa Baggalúts sameinast indverskum fréttamiðli

Það er skammt stórra högga á milli í fjölmiðlabransanum í dag. Fréttastofur Ríkisútvarps og -sjónvarps voru sameinaðar fyrr í dag, og nú síðdegis var tilkynnt um sameiningu fréttastofu Stöðvar 2 og Vísis.is. Nýjustu fregnir á fjölmiðlamarkaði koma hinsvegar úr herbúðum fréttastofu Baggalúts.

„Fréttastofa Baggalúts hefur verið sameinuð indversku héraðsfréttastofunni HotHinduNews," segir á vefsíðu Baggalúts. Þar kemur fram að gott og náið samstarf hafi verið milli fréttastofanna um langa hríð.

Á vefsíðu Baggalúts segir að fréttastofurnar hafi um langa hríð átt náið og gott samstarf um ýmis fagleg og rekstrarleg mál. Fréttamenn baggalúts séu ekki á eitt sáttir um breytingarnar, en þeim ku hafa þótt freklega gengið framhjá reyndum fréttastjóra Baggalúts, Málfríði Einarz, þegar apinn Hóras, sem er indverskur að uppruna, var skipaður yfirmaður sameinaðrar fréttastofu

„Um áttatíu manns starfa á fréttastofunni eftir sameininguna - frétta-, dagskrárgerðar-, tækni- og yfirmenn og aðstoðarkonur," segir á vefnum. „Undir fréttastofuna heyra alls 104 svæðisstöðvar á Indlandi, í Færeyjum og á Íslandi auk ritstjórnar baggalúts.is og indiansupermonkeybabes.tv. Þá færist núverandi framleiðsla á erótískum fræðslumyndböndum fyrir fullorðna undir fréttastofuna."