Fagráð Kirkjunnar segist ekki hafa skaðað rannsókn á kynferðisbrotum

Fagráð Þjóðkirkjunnar um kynferðisbrot segist ekkert hafa gert sem skaðað gæti rannsókn á meintum kynferðisbrotum Gunnars Björnssonar prests á Selfossi.

Fyrrverandi forstöðumaður Barnahúss hefur bent á að aðkoma fagráðs um meðferð kynferðisbrota inna þjóðkirkjunnar að málinu sé til þess fallin að gera framburð vitnis fyrir dómi rýrari vegna þess að menn geti bent á að með endurteknum viðtölum sé hægt að hafa áhrif á hvað barn segir, auk þess sem slík viðtöl geti verið íþyngjandi.

Í yfirlýsingu sem fagráðið sendi frá sér í dag segir að fagráðið hafi ekki rætt við meintan þolanda og því ekki raskað rannsóknarhagsmunum. Þar segir að í tilvikum þar sem börn eigi hlut að máli, sé þeim sem ber málið fram gerð grein fyrir því að málinu skuli vísað til barnaverndarnefndar.