Fangar fá frið frá forvitnum í Kópavogi

Vegfarendendur á Kópavogsbraut hafa tekið eftir því að girðingin umhverfis fangelsið sem staðsett er í götunni hefur verið klædd með striga. Guðmundur Gíslason, forstöðumaður fangelsana á höfuðborgarsvæðinu segir að fangarnir hafi farið fram á að þetta yrði gert til þess að koma í veg fyrir að forvitin augu gætu horft á þá þegar þeir eru í garðinum.

„Byggðin hefur verið að færast sífellt nær fangelsinu og við höfum verið með létta girðingu umhverfis fangelsis sem sést í gegnum," segir Guðmundur. Hann segir að fangarnir hafi farið að kvarta yfir því að vegfarendur væru að gjóa augunum inn fangelsisgarðinn í sumar en þá voru menn mikið í garðinum þar sem veðrið var með eindæmum gott. „Við leituðum því leiða til að byrgja fólki sín og ákváðum að klæða girðinguna svona. Þetta er kannski ekki það fallegasta í bænum en þetta er ákveðin tilraun."

Aðspurður hvort standi til að breyta girðingunni til frambúðar þannig að ekki sjáist í gegnum hana segir Guðmundur svo ekki vera. „Fangelsið er ekki þarna til frambúðar þótt ekki hafi verið ákveðið hvenær því verður lokað," segir Guðmundur og bendir á að á skipulagi bæjarins sé hverfið allt skipulagt undir íbúðabyggð.

Fangelsið, sem í daglegu tali er kallað Kvennafangelsið, var stofnað árið 1989. Þrátt fyrir nafngiftina dvelja í fangelsinu karlar jafnt sem konur.