Orkuveitan hvetur til þess að gróðurskemmdir verði rannsakaðar

Orkuveita Reykjavíkur hvetur til þess að gróðurskemmdir vestan Reykjafells á Hengilssvæðinu verði rannsakaðar ofan í kjölinn. Mbl.is greindi frá því í morgun að miklar skemmdir hafi orðið á mosa á svæðinu og sérfræðingur frá Náttúrufræðistofnun sagði nær öruggt að um sé að ræða mengun af völdum brennisteinsvetnis. Þetta vill Orkuveitan kanna, „sérstaklega með það fyrir augum að kanna hvort starfsemi Hellisheiðarvirkjunar hafi haft áhrif þarna á," segir í tilkynningu frá OR.

Í sömu tilkynningu er bent á að ekki hafi orðið vart svipaðra gróðurskemmda við Nesjavallavirkjun, sem starfrækt hefur verið í tæpa tvo áratugi á sama jarðhitasvæði.

„Orkuveita Reykjavíkur tekur umræðu um umhverfismál mjög alvarlega," segir Hjörleifur B. Kvaran, forstjóri Orkuveitu Reykjavíkur í tilkynningunni. „Á Hellisheiðinni og þar í grennd erum við í samstarfi við fjölda aðila um uppgræðslu- þ.á.m. Landgræðsluna, Náttúrufræðistofnun og almannasamtökin Gróður fyrir fólk - og erum að vinna að því að endurheimta gróður. Það er því slæmt að horfa upp á þessir skemmdir á svæðinu," segir Hjörleifur.

Hellisheiðarvirkjun framleiðir nú svipað mikla orku og Nesjavallavirkjun. „Starfsfólk Orkuveitunnar hefur þegar verið í sambandi við starfsfólk Náttúrufræðistofnunar í því skyni að afla sér frekari upplýsinga og bollaleggja um hvernig best sé að rannsaka tilgátur vísindamanna á sem skemmstum tíma. Brennisteinsvetni, eða hveralykt, finnst sumum hvimleiður fylgifiskur jarðhitanýtingar. Brennisteinsvetnið er um 0,01% af útblæstri virkjananna á Hengilssvæðinu. Nú er unnið að því að skilja lofttegundina frá gufunni og verður henni skilað aftur ofan í jarðhitageyminn um niðurrennslisholur við virkjunina. Sömu aðferð verður beitt á þær virkjanir Orkuveitu Reykjavíkur sem fyrirhugaðar eru. Þá á Orkuveitan einnig í samstarfi við líftækifyrirtækið Prókatín um nýtingu brennisteinsvetnis til framleiðslu á prótíni, sem nýta má t.d. í skepnufóður."