Kona dæmd fyrir þjófnað í dansskóla

Rétt tæplega þrítug kona var í Héraðsdómi Reykjavíkur í dag dæmd í sex mánaða skilorðsbundið fangelsi fyrir gripdeild og þjófnað.

Þann 28. nóvember rændi konan farsíma og bíllyklum úr herbergi starfsmanna dansskóla í Reykjavík en konan var þar stödd að eigin sögn til að spyrjast fyrir um balletkennslu fyrir dóttur sína. Hún neitaði að hafa stolið farsímanum og bíllyklunum en frásögn hennar af atburðum þótti fjarstæðukennd. Eftirlitsmyndavélar sýndu til að mynda svo ekki var um villst að konan var sek. Þar að auki fundust bíllyklarnir sem stolið var á heimili hennar.

Konan hefur nokkrum sinnum áður fengið dóma fyrir svipuð brot. Henni var því dæmd refsing með tilsjón af því. Þó þótti rétt að skilorðsbinda fangelsisdóminn.