Bílum hleypt í hollum á Reykjanesbraut

Björgunarsveitarmenn á Suðvesturlandi hafa staðið í ströngu við að aðstoða ökumenn á helstu leiðum til og frá Reykjavík í þeirri ófærð sem skapaðist í gærkvöld og nótt með mikilli ofankomu.

Mestar annir hafa verið hjá björgunarsveitunum fimm á Suðurnesjum þar sem Reykjanesbrautin var lokuð í mestallan morgun. Var það vegna þess að mikil skóf á veginn og festust fjölmargir bílar í sköflum þar. Björgunarsveitarmenn hafa aðstoðað á þriðja tug bíla þar í dag og eru enn að en fastir bílar hafa komið veg fyrir að hægt sé að ryðja veginn.

Nú er hins vegar búið að opna Reykjanesbrautina að Grindavíkurafleggara og er hleypt í hollum í gegn með fylgd lögreglu og björgunarsveitarmanna. Björgunarsveitarmaður sem fréttastofa ræddi við fyrir stundu sagði allt upp í 50 bíla raðir vera á Reykjanesbrautinni vegna færðarinnar.

Í tilkynningu frá Vegagerðinni er bent á að búið sé að opna Þrengsli en þar er hálka og éljagangur en enn er ófært á Hellisheiði. Á mögum leiðum á Suðurlandsundirlendi er þungfært eða þæfingsfærð. Á Vesturlandi er hálka, snjóþekja, éljagangur og slæm færð á öllum leiðum og ófært er á Bröttubrekku og þungfært og stórhríð er á Holtavörðuheiði.