Sýknaður af því að gægjast á nakta stúlku

Eigandi sólbaðsstofu á Suðurlandi hefur verið sýknaður af ákæru um að hafa gægst á fimmtán ára stúlku þar sem hún lá á nærbuxum einum klæða inni í ljósabekk í verslunarhúsnæði þess ákærða.

Samkvæmt ákæru áttu atburðirnir að hafa gerst í mars í fyrra. Stúlkan segist hafa legið á bakinu og verið að laga höfuðpúðann er hún kvaðst hafa orðið vör við ákærða þar sem hann kraup við fótgaflinn á ljósabekknum og var að kíkja inn. Stúlkan segir að maðurinn hafi staðið upp og farið út er hann hafi orðið var við að hún opnaði augun.

Þar sem engin vitni urðu að atburðunum og frásögn stúlkunnar greindi á við frásögn þess ákærða þótti sekt hans ekki sönnuð. Maðurinn var því sýknaður af ákærunni.