Franskur ríkisborgari framseldur

Eftirlýstur franskur ríkisborgari sem handtekinn var hér á landi í byrjun júní verður fluttur til Frakklands við fyrsta tækifæri. Hann samþykkti framsalsákvörðun dómsmálaráðuneytisins án andmæla.

Frakkinn var eftirlýstur fyrir brot sem hann framdi þegar hann var bjó í Frakklandi. Þar á hann að hafa stolið um 24 milljónum frá ýmsum fyrirtækjum með tölvusvindli.

Fulltrúar frá alþjóðadeild Ríkislögreglustjóra handtóku Frakkann sem farið hafði huldu höfði í miðbæ Reykjavíkur í tvö ár. Þeir sem til hans þekkja segja hann hafa setið löngum stundum á internetkaffihúsum en enginn vissi um dökka fortíð hans.

Eftir að Frakkinn var settur í gæsluvarðhald fóru frönsk yfirvöld fram á að hann yrði framseldur. Dómsmálaráðuneytið ákvað fyrir helgi að verða við framsalsbeiðninni og samkvæmt upplýsingum frá Þóri Hrafnssyni, aðstoðarmanni dómsmálaráðherra, hefur Frakkanum verið birtur úrskurðurinn.

"Hann samþykkti ákvörðun ráðuneytisins, bar hana ekki undir dómstóla og verður fluttur til Frakklands við fyrsta tækifæri. Alþjóðadeild ríkislögreglustjóra sér um flutninginn," segir Þórir.