Kvartar yfir GSM-sambandi í Innri-Njarðvík - Síminn lofar úrbótum

„Við erum með á áætlun þessa árs að styrkja farsímasambandið í Innri-Njarðvík og höfum verið að leita eftir aðstöðu á svæðinu til að hýsa búnaðinn," segir Linda Björk Waage, forstöðumaður á samskiptasviði Skipta, móðurfélags Símans, en Vísir leitaði til hennar eftir að óánægður viðskiptavinur Símans lét í sér heyra í gær.

Viðskiptavinurinn, kona sem býr í Innri-Njarðvík í Reykjanesbæ, sagði sínar farir ekki sléttar og kvað GSM-samband á og við heimili sitt með eindæmum slitrótt. Taldi hún það skjóta skökku við að Síminn færði fréttir af GSM-sambandi á Kili og Hvannadalshnjúk á meðan þéttbýlissvæði á Suðurnesjum yrðu út undan.

Sagðist hún enn fremur oft ekkert GSM-samband hafa nema á litlum bletti í bílskúrnum hjá sér, annars gæfi síminn þau skilaboð að einungis væri mögulegt að hringja neyðarsímtöl, það er að segja í Neyðarlínuna.

Linda Björk á samskiptasviðinu segir það geta tekið tíma að fá aðstöðu til að hýsa búnaðinn í nýrri íbúðahverfum en Síminn hafi hins vegar unnið að því að stækka og þétta þjónustusvæði sitt jafnt í dreifbýli sem þéttbýli ásamt því að ná betur til miðanna úti fyrir ströndum landsins.

„Á sama tíma er að sjálfsögðu verið að skoða með hvaða hætti við getum bætt þjónustuna enn frekar þar sem hún er þegar til staðar og eins og kom fram áðan er verið að skoða Innri-Njarðvík í því sambandi. Allt eru þetta verkefni sem miða að því að stórefla þjónustusvæði Símans hvar sem fólk er statt á landinu," segir Linda Björk að lokum.