Skíthræddir við framtíðina

„Við erum skíthræddir við haustið," segir Þorbjörn Guðmundsson, framkvæmdastjóri Samiðnar. Þorbjörn segir að ástandið á vinnumarkaðnum sé ágætt fyrir iðnaðarmenn þessa dagana, þrátt fyrir að JB byggingarfélag hafi sagt upp 40 manns frá því um síðustu mánaðamót. Enn séu mörg verkefni í gangi sem krefjist mannafla. „En ef að íbúðamarkaðurinn nánast stoppar í haust að þá stoppa náttúrulega framkvæmdir líka," segir Þorbjörn.

Þorbjörn segir þó fyrst og fremst óvissuástand ríkja á markaðnum núna þvi enginn viti hvað framtíðin beri í skauti sér. Þó megi ekki gleyma því að þrátt fyrir að samdráttur gæti verið á fasteignamarkaðnum þá séu nokkrar stórar framkvæmdir fyrir höndum, svo sem tónlistar- og ráðstefnuhúsið, tvöföldun Reykjanesbrautar, brúasmíði og álver við Helguvík.