Vill funda með ráðherra um reykingabann

Baldvin Samúelsson, eigandi Barsins og annarra veitingastaða, hefur sent Guðlaugi Þór Þórðarsyni heilbrigðisráðherra tölvubréf og óskað eftir fundi. Hann óskar eftir því að ráðherra og félag kráareigenda vinni að sameiginlegu markmiði um að koma á „góðu og gildu reykingabanni".

Baldvin segir að meðaltals veltuminnkunn á krám hafi verið um 30% frá því að reykingabann tók gildi þann 1. júní í fyrra. Hann vísar í uppsagnir HB Granda á Akranesi og segir að sá fjöldi sem missi vinnuna þar sé um helmingurinn af þeim sem starfi á meðal skemmtistað eða krá.

„Við erum iðnaður sem skapar fleiri hundruð milljónir í ríkissjóð á ári hverju þannig að mér finnst það skjóta svolítið skökku við að okkar atvinnubúgrein sé sett útí kuldan með einu pennastriki án samráðs við kráar eigendur," segir í bréfinu.

„Ég segi það hér og nú að ég er ekki á móti reykingabanni en vill að ég geti boðið mínum viðskiptavini að geta reykt og drukkið samtímis án þess að eiga það á hættu að það sé laumað nauðgunarlyfi eða fíkniefnum í glasið sitt sem er því miður allt of algengt í dag og ég get sagt þér það að ég kem ekki til með að hætta mínum mótmælum fyrr en að svo verður, " segir Baldvin síðar í bréfinu.

Baldvin lýkur bréfi sínu á því að segja að hann voni að Guðlaugur sjái sér fært að láta kanna það hvort að í jafnræðisreglu stjórnarskrárinnar standi ekki að allir séu jafnir fyrir lögum og þar með talið Alþingi sem og Leifsstöð og aðrir vinnustaðir sem leyfi reykingar.