Fjöldi fíkniefnahunda hefur þrefaldast frá 2000

Fjöldi fíkniefnaleitarhunda lögreglunnar hefur þrefaldast á síðustu átta árum. Árið 2000 voru þeir fjórir en nú eru þeir 12. Í greinagerð sem lögreglan hefur gefið út segir að mikil uppbygging og framþróun hefur orðið á skipulagi og notkun fíkniefnaleitarhunda frá því að fyrsti hundurinn var tekinn í þjónustu lögreglunnar, árið 1971.

Í mars 2007 gaf ríkislögreglustjóri út reglur um fíkniefnaleitarhunda lögreglunnar, þjálfun þeirra og þjálfara. Þar var sett fram heildarskipulag tengt fíkniefnaleitarhundum, byggt á reynslu af samskonar reglum frá árinu 2004. Í reglunum segir meðal annars að stefna beri að því að minnst einn fíkniefnaleitarhundur sé til taks í hverjum landsfjórðungi og að allir lögreglustjórar hafi greiðan aðgang að slíkum hundum.