Létust þar sem þeir voru ekki í bílbeltum

Rannsóknarnefnd umferðarslysa hefur lokið rannsókn á tveimur banaslysum sem urðu í fyrra. Í báðum tilvikum má rekja dauða ökumanna meðal annars til þess að þeir voru ekki bílbelti og köstuðust þeir af þeim sökum út úr bílum sínum.

Fyrra banaslysið varð í Hörgárdal í byrjun mars en þar hafnaði fólksbifreið út af veginum eftir að ökumaður hennar hafði misst stjórn á henni í hálku. Segir í skýrslu Rannsóknanefndar umferðaslysa að ökumaður hafi ekki verið með belti og eru líkur á að hann hefði lifað slysið af ef hann hefði verið með beltið spennt.

Hins vegar segir einnig að ekki sé hægt að útiloka að orsök slyssins megi rekja til hjartasjúkdóms ökumanns en við réttarkrufningu kom hann í ljós. Óyggjandi er þó að dánarorsök mannsins voru þeir áverkar sem af slysinu hlutust.

Þá bendir rannsóknarnefndin á að maðurinn hafi ekið of hratt miðað við þá hálku sem var á veginum og ósamstæðir hjólbarðar hafi verið að framan á bílnum. Enn fremur hafi veri hár brattur bakki fram af veginum þar sem bifreiðin fór út af og að mati rannsóknarnefndarinnar er því nauðsynlegt að lagfæra umhverfi vegarins, annaðhvort bæta öryggissvæði og fláa, eða setja upp vegrið.

Mjög ölvaður undir stýri

Síðara slysið varð á Þorlákshafnarvegi. Þar var ók maður bifreið sinni afar ógætilega út úr Hveragerði og og að sögn vitna var hún á mikilli ferð og nokkrum sinnum nærri því að lenda í árekstri við önnur ökutæki.

Rétt sunnan afleggjarans að Grímslæk missti ökumaðurinn stjórn á bifreiðinni um það leyti sem hún mætti annarri bifreið og fór út af veginum á gagnstæðum vegarhelmingi. Bifreiðin valt nokkrar veltur, kastaðist yfir girðingu og endaði á toppnum. Við þetta kastaðist maðurinn út úr bifreiðinni, en hann var ekki spenntur í öryggisbelti.

Áfengis- og lyfjapróf leiddu í ljós að ökumaður bifreiðarinnar var mjög ölvaður þegar slysið átti sér stað. Rannsóknarnefnd umferðarslysa tilgreinir þrjár orsakir banaslyssins, það er að ökumaður hafi verið mjög ölvaður, að hann hafi ekið of hratt og hafi ekki verið spenntur í öryggisbelti.

„Rannsóknarnefnd umferðarslysa ítrekar fyrri ábendingar um skaðsemi ölvunaraksturs. Í þessu tilfelli var einnig um glannalegan hraðakstur að ræða og hefði getað farið verr ef árekstur hefði orðið við annað ökutæki eða óvarinn vegfarenda. Nefndin áréttar mikilvægi þess að aðstandendur tilkynni til lögreglu ef þeir verða varir við að einhver setjist undir stýri án þess að vera í ástandi til þess. Tafarlaust skal hringja í 112 í slíkum tilfellum því að mannslíf eru í húfi," segir í skýrslunni.