Launavandræði á Hvarfi bænum að kenna

Þór Jónsson, upplýsingafulltrúi Kópavogsbæjar, segir það bæjarkerfinu að kenna að ekki voru til peningar til þess að greiða starfsfólki á leikskólanum Hvarfi laun í morgun. Hann segir að reikningur sem bærinn átti að greiða hafi ekki verið greiddur og því hafi rekstraraðilar leikskólans ekki átt fyrir launakostnaði.

Starfsfólk leikskólans hringdi í foreldra barnanna á Hvarfi í dag og bað um að þau yrðu sótt þar sem ekki væri búið að greiða laun.

„Þegar fréttir bárust af vandræðunum var gengið í að finna þennan reikning og greiða hann," segir Þór. „Eitt símtal frá Hvarfi hefði komið í veg fyrir að foreldrar hefðu þurft að verða fyrir óþægindum," bætir Þór við.