Réðst á móður sína vegna deilna um tölvunotkun

Lögregla var kölluð að heimili í Reykjavík í gær vegna ágreinings um tölvunotkun.

Þar áttu mæðgin í útistöðum en þrætueplið var tölvunotkun sonarins. Þeim tókst ekki að útkljá málið en svo fór að sonurinn, sem er á unglingsaldri, réðst að móður sinni og rauk síðan á dyr. Áverkar hennar reyndust ekki alvarlegir en móðurinni var eðlilega brugðið og leitað því til lögreglu. Lögregla segir í frétt sinni að því miður sé málið ekki einsdæmi en lögreglan á höfuðborgarsvæðinu hefur áður sinnt útköllum eins og þessu.