Fjórum sundlaugum lokað vegna heitavatnsskorts

Báðar sundlaugarnar í Árborg eru lokaðar en ekki hefur enn þurft að skammta vatn til atvinnulífsins eða almennings. Aldrei áður hefur jafn mikið hitaveituvatn verið notað á höfuðborgarsvæðinu og í morgun, en það jafnast á við streymi Elliðaánna.

Um er að ræða Sundhöll Selfoss og sundlaugina á Stokkseyri og verða þær lokaðar um óákveðinn tíma. Þá er búið að taka vatn af upphituðum sparkvöllum og hitaða grasvellinum.

Að sögn Guðmundar Þorsteinssonar hjá Selfossveitum anna borholurnar í landi Laugadæla og Ósabotna ekki þörfinni þegar kuldinn verður svona mikill. Nýbúið er að bora nýja holu við Ósabotna en hún verður ekki fullvirkjuð fyrr en næsta vetur.

Mjög hröð uppbygging hefur verið á árborgarsvæðinu síðustu misseri og eru nú svo komið að veituframkvæmdir hafa ekki lengur við stækkuninni.

Þá hefur sundlaugunum á Akranesi og í Borgarnesi verið lokað af sömu ástæðu og er ekki útilokað að vatn verði takmarkað til almennra notenda á þeim svæðum. Þar anna aðveitulagnir ekki álaginu og bilun í kerfinu fyrr í vikunni varð til þess að ekki var hægt að dæla nægilegu magni í bIrgðageyma.

Enginn vatnsskortur er hins vegar á höfuðborgarsvæðinu og í morgun var slegið rennslismet þegar 15.200 tonnum var dælt um kerfið á klkukkustund. Það slagar hátt upp í meðal rennsli Elliðaánna.