Alþjóðahús skilji betur á milli túlka þjónustu og annarrar starfsemi

Samkeppniseftirlitið hefur gert Alþjóðahúsi að skilja fjárhagslega á milli annars vegar túlka- og þýðingarþjónustu Alþjóðahúss og hins vegar annarrar starfsemi Alþjóðahúss.

Eftirlitinu barst kæra frá fyrirtækinu Skjali í haust þar sem því var haldið fram að með því að bjóða upp á þýðingar- og túlkaþjónustu væri Alþjóðahús í beinni samkeppni við fjölmarga þýðendur á markaði. Því hefðu forsvarsmenn Skjals ástæðu til þess að ætla að Alþjóðahús niðurgreiddi þýðingar- og túlkaþjónustu með öðrum hlutum þess, þar á meðal styrkjum frá opinberum aðilum.

Við athugun á málinu komst Samkeppniseftirlitið að því að túlka- og þýðingarþjónusta Alþjóðahúss væri ekki nægilega vel skilin frá starfsemi sem nyti opinberra styrkja og við því þyrfti að bregðast, ellegar raskaði það samkeppni á almennum markaði túlka- og þýðingarþjónustu.