Starfsfólk Laugarnesskóla ekki á nálum

„Það er langt um liðið síðan við höfum fundið nálar á skólalóðinni," segir Sigríður Heiða Bragadóttir, skólastjóri Laugarnesskóla, sem lætur fréttir af skálmöld og sprautunálum í Laugardalnum ekki raska ró sinni.

„Ég skynja Laugardalinn ekki eins og þessi móðir [sem Morgunblaðið ræddi við föstudaginn 19. september] en ég dreg samt ekki úr því að ef það er eitthvað sem þarf að bæta, til dæmis lýsing, þá á bara að gera það," segir Sigríður enn fremur og segir málið ekki hafa verið rætt sérstaklega í skólanum. Hún kveðst sammála Jórunni Frímannsdóttur sem Vísir ræddi við í dag um að sýnileiki og umferð fólks í dalnum væri nauðsynlegur þáttur til að tryggja öryggi fólks þar. Vandamálið teygi sig hins vegar ekki inn í skólann til hennar þar sem nemendur og kennarar uni glaðir við sitt.