Heimili formanns ungra frjálslyndra grýtt með eggjum

Viðar Helgi Guðjohnsen formaður ungra frjálslyndra var í fasta svefni á heimili sínu um miðja nótt í vikunni þegar eggjabakki fékk að fljúga í framhliðina á húsinu. Viðar rumskaði ekki en bróðir hans vaknaði við eggin og náði bílnúmerinu hjá kösturunum. Viðar hefur átt í útistöðum við félag Anti-rasista undanfarið.

„Ég veit ekkert hvort þeir stóðu að baki þessu og efast reyndar um að svo sé, miðað við það sem hann hefur sagt," segir Viðar og á þar við Dane Magnússon formann Anti-rasista félagsins á Íslandi.

Viðar sem heldur úti bloggsíðu hefur átt í deilum við Dane og félaga og ætlaði meira að segja að kæra þá fyrir að birta lygar um sig og samflokksmenn sína á heimasíðu félagsins.

„Þeir vissu upp á sig skömmina og tóku þetta út. Þeir hafa samt ekki enn beðið mig afsökunar," segir Viðar en á síðu Anti-rasista var því m.a haldið fram að Viðar væri meðlimur í bresku nýnasistasamtökunum Combat 18 sem virðast vera að ryðja sér til rúms hér á landi.

Viðar þvertekur fyrir að tilheyra nýnasistasamtökunum og hefur ekki hugmynd um hverjir það eru sem standa að baki íslensku rasistasíðunni skapari.com en þar hefur komið fram að Combat 18 sé komið til Íslands.

„Ég hef ekki hugmynd um það, enda umgengst ég ekki svona fólk."

Viðar segir að eggin séu lífræn og að mestu leyti farin af húsinu. Hann er því lítið að stressa sig yfir því hverjir stóðu að baki árásinni. „Mig grunar hinsvegar að þetta séu sömu aðilar og dreifðu hatursbréfum um mig í nágrannahúsin, þetta gæti tengst því."