Þriggja ára dómur yfir Kompás-lögmanni staðfestur

Hæstiréttur staðfesti í dag þriggja ára fangelsisdóm yfir Róberti Árna Hreiðarssyni, fyrrverandi lögmanni, fyrir kynferðisbrot.

Róbert Árni var í september síðastliðnum dæmdur fyrir kynferðisbrot gagnvart fjórum stúlkum og sömuleiðis fyrir vörslu barnakláms. Hann var hins vegar sýknaður af vörslu barnakláms í Hæstarétti. Róbert var meðal annars sakfelldur fyrir að hafa tælt hluta stúlknanna til kynferðismaka við sig gegn peningagreiðslum en hann komst í samband við þær með því að villa á sér heimildir á Netinu.

Héraðsdómur sagði ljóst Róbert hefði nýtt sér yfirburðastöðu sína í krafti aldurs síns og reynslu gagnvart unglingsstúlkunum sem voru á viðkvæmu kynþroskaskeiði. Í svipaðan streng tók Hæstiréttur og sagði enn fremur að brot hans hafi verið ítrekuð og brotavilji einbeittur.

Róbert var starfandi lögfræðingur þegar brotin áttu sér stað en hann hafði meðal annars annast hagsmunagæslu fyrir brotaþola í sakamálum og sinnt verjandastörfum í kynferðisbrotamálum. Fréttaskýringarþátturinn Kompás fjallaði um mál hans síðastliðið haust.

Róbert var sviptur lögmannsréttindum sínum með dómi héraðsdóms síðastliðið haust og var sá úrskurður staðfestur í dag. Auk þessa var hann dæmdur til að greiða stúlkunum á bilinu 300 þúsund krónur til eina milljón í miskabætur, samanlagt 2,4 milljónir króna.