Hanna Birna nýr forystumaður Sjálfstæðisflokksins?

Hanna Birna Kristjánsdóttir borgarfulltrúi Sjálfstæðisflokksins er í Morgunblaðinu í dag talin framtíðarforystumaður flokksins í borgarmálum. Í Staksteinum segir að í kjölfar átaka á vettvangi stjórnmála komi stundum nýir forystumenn fram á sjónarsviðið. Það hafi gerst í borgarstjórnarflokki Sjálfstæðisflokksins frá því að meirihluti flokksins og Framsóknar féll í október.

Samstaða sé að verða meðal sjálfstæðismanna um forystuhæfileika Hönnu Birnu og að; „þar megi sjá framtíð Sjálfstæðisflokksins í borgarstjórn." Tekið er fram að þó ekki sé enn full eining um Hönnu Birnu meðal stuðningsmanna Sjálfstæðisflokksins þyki framkoma hennar í kjölfar REI málsins traustvekjandi.

Í Staksteinum segir að Hann Birna sé; „Í senn kraftmikil baráttukona en sanngjörn í garð andstæðinga."