Tuttugu dæmi um mansal á Íslandi

Minnst tuttugu dæmi um mansal hafa komið upp hér á landi. Margrét

Steinarsdóttir, lögfræðingur í Alþjóðahúsi, segist hafa hitt minnst átta fórnarlömb síðustu fjögur árin. Um falið vandamál sé að ræða og

því megi búast við að fórnarlömbin séu enn fleiri.

Gerð var óformleg könnun á vinnufundi með fulltrúum frá Stígamótum, Kvennaathvarfinu, lögreglunni, Alþjóðahúsi, Ríkislögreglustjóra,

Ríkissaksóknara, Félagsþjónustunni og sjálfstætt starfandi lögmanni og kom þar fram að flestir fundarmanna höfðu hitt frá sex og upp í tuttugu fórnarlömb mansals hver. Um einhverja skörun getur verið að ræða.

Margrét segir að birtingarmynd mansals geti verið með ýmsum hætti en fórnarlömbin eigi það öll sameiginlegt að flýja neyð og að bágar aðstæður þeirra séu misnotaðar. Í sumum tilvikum komi þau af fúsum og frjálsum vilja til landsins og gifting sé þeirra leið til að fá dvalarleyfi. Fórnarlömbunum sé oft stjórnað, þau ráði ekki yfir launum sínum og vegabréf hafi verið tekin af þeim.

Innanlandssvið Rauða krossins ætlar að kanna mansal á Íslandi og stefnir að því að gera það í samstarfi við stjórnvöld. Helga G. Halldórsdóttir, sviðsstjóri hjá Rauða krossinum, segir að ýmislegt bendi til að mansal

fyrirfinnist á Íslandi eins og í öðrum löndum. Umfang og eðli verði kannað fyrir árslok og sett verði upp aðgerðaáætlun um hvernig eigi að ná til þeirra verst stöddu.

„Við höfum áhuga á að fá mynd af því hvers eðlis þetta vandamál er og til að komast að því þurfum við að gera rannsókn. Ef mansal fer hér fram þá er eðlilegt að við könnum það," segir Helga og gerir ráð fyrir að sömu útgáfur af mansali finnist hér og þekkjast annars staðar.

Félagsmálaráðherra hefur skipað starfshóp sem á að fjalla um hvernig megi standa að gerð og framkvæmd heildstæðrar áætlunar gegn mansali á Íslandi.