Vinnubrögðin við Laugaveg 4 og 6 sögð fáheyrð

Óskar Bergsson, borgarfulltrúi Framsóknarflokksins, segir að vinnubrögð núverandi meirihluta borgarstjórnar við Laugaveg 4 og 6 séu fáheyrð þar sem virðing fyrir almannafé og vandaðri stjórnsýslu er gefið langt nef.

Óskar lagði fram fyrirspurn um málið til byggingar- og skipulagssviðs borgarinnar um þá vinnu sem ögð hefði verið í deiliskipulag Laugarvegsreitar. Í svari skipulags- og byggingarsviðs kemur fram m.a. að leiðarljósið í deiliskipulagi Laugavegsreita var að Laugavegur sé aðalverslunargata Reykjavíkur, þar sem sjónarmið uppbyggingar og varðveislu haldast í hendur.

„Í stað þess að nýta alla þá vönduðu vinnu sem borgarstarfsmenn, borgarfulltrúar og húsverndarsérfræðingar hafa lagt til og hér hefur verið lögð fram, hefur Sjálfstæðisflokkurinn og borgarstjóri gert þessa vinnu að engu og hleypt upp verði á óbyggðum fermetrum í miðborg Reykjavíkur," segir Óskar.

„Kaupin á Laugavegi 4 og 6 og Skólavörðustíg 1A hafa dregið úr trúverðugleika borgarinnar sem skipulagsvalds, hafa sett skipulag Laugavegsreita í uppnám og hleypt upp verði á gömlum húsum í miðborginni."