Utanríkisráðherra fundaði með breskum ráðamönnum

„Ingibjörg Sólrún Gísladóttir utanríkisráðherra fundaði í dag með breskum ráðamönnum og flutti framsögu á hádegisverðarfundi bresk-íslenska verslunarráðsins með bresku og íslensku viðskiptafólki í stuttri heimsókn til Bretlands." Þetta segir í fréttatilkynningu frá utanríkisráðuneytinu. Þar segir enn fremur:

„Á fundi med Jim Murphy, ráðherra samskipta við Evrópu, var rætt um málefni Evrópusambandsins, Hatton Rockall-svæðið, öryggismál á Norðurslóðum og hvalveiðar. Undirrituðu ráðherrarnir samkomulag um samstarf í varnarmálum. Þá átti utanríkisráðherra og fund um málefni öryggisráðs Sameinuðu þjóðanna með háttsettum embættismönnum í breska utanríkisráðuneytinu. Loks hitti ráðherra Malloch Brown lávarð, ráðherra málefna Afríku, Asíu og SÞ, og ræddu þau um þróunarsamvinnu, málefni Sómalíu, fæðuöryggi og áhrif verðhækkana um heim allan á matvælum. Ingibjörg Sólrún hittir Íslendinga búsetta í Lundúnum síðar í dag, áður en hún heldur aftur til Reykjavíkur í kvöld."