Hafró beitir skyndilokun á síldveiðar

Enn eitt reiðarslagið dundi á síldveiðiflotanum í gærkvöldi þegar Hafrannsóknarstofnun beitti skyndilokun á stóru svæði í sunnanverðum Faxaflóa, út af Njarðvík og Keflavík, og einnig skyndilokun á síldveiðisvæðinu við Vestmannaeyjar, þar sem skip voru farin að fá stór köst.

Lokanirnar gilda í allt að tvær vikur. Ástæðan er að allt of hátt hlutfall smásíldar reyndist vera í afla skipanna. Í einu skipi reyndust rúm 40 prósent vera smásíld og í öðru var tæpur helmingur aflans smásíld.

Ekkert verður því veitt á þessum svæðum á næstunni og eru nokkur síldveiðiskip farin í land, en að minnsta kosti fjögur héldu inn á Breiðafjörðinn á ný. Þar er síldin sýkt og ekki hægt að vinna hana til manneldis, en hún er brúkleg í bræðslu, sem gefur mun minna af sér í útflutningsverðmæti talið.