Hjálpa fólki sem á erfitt andlega

Stofnaður hefur verið nýr sjóður til styrktar þeim sem eiga erfitt andlega. Sjóðurinn nefnist „ÞÚ GETUR!" og er nýtt afl í baráttunni fyrir forvörnum og geðheilsueflingu.

Samkvæmt fréttatilkynningu er markmið hans að styrkja þá til náms sem átt hafa við geðræn veikindi að stríða, að efla nýsköpun og bætta geðheilbrigðisþjónustu, að efla fræðslu og forvarnir og að standa að aðgerðum sem draga úr fordómum í samfélaginu.

 

 

Vísir spurði einn af stofnendum sjóðsins Ólaf Þór Ævarsson geðlæknir Ph. D. um nýja sjóðinn og tilgang hans:

 

 

„Sjóðurinn er forvarna- og fræðslusjóður sem hefur þrjú markmið. Í fyrsta lagi til að styðja þá til náms sem eru að vinna sig úr allri vanlíðan. Þá erum við að hugsa um að fólkið geti keypt bækur, greitt skólagjöld eða keypt tölvur. Ég þekki þetta vel úr starfinu og veit að það er mikilvægt. Í öðru lagi að vinna markvisst gegn fordómum og í þriðja lagi að styðja fagfólk í geðheilbrigðisfræðum sem hefur áhuga á að byggja upp nýjungar í geðheilbrigðisþjónustu og eru frumkvöðlar með nýjar hugmyndir," segir Ólafur Ævar.

 

 

Í fréttatilkynningu sjóðsins er minnst á að einhverjir kynnu að segja að söfnun af þessu tagi sé ekki vel tímasett og að fjáröflun kunni að reynast erfið má allt eins segja að á erfiðleikatímum sem nú eru í þjóðfélaginu sé afar mikilvægt að vekja athygli á málstað þeirra sem minna mega sín. Fátt gæti verið mikilvægara á þrengingartímum en einmitt að efla einstaklinga til náms.

 

 

Kynning og fjáröflun hefst með tónleikum í Háskólabíó miðvikudagskvöldið 12. nóvember þar sem margir af þekktustu tónlistarmönnum þjóðarinnar hafa þegar ákveðið að leggja málefninu lið og taka þar þátt og gefa vinnu sína.

 

 

Nánari upplýsingar má finna á vefnum www.stress.is