Sama þótt sér sé líkt við fjöldamorðingja

Guðlaugur Þór Þórðarsson, heilbrigðisráðherra, kippir sig ekki upp við að vera líkt við fjöldamorðingja.

Ögmundur Jónasson, þingflokksformaður VG, birti fyrr í vikunni á heimasíðu sinni mynd sem virðist sýna Guðlaug Þór taka í hönd Moammar Gaddafi, Lýbíuleiðtoga.

Ýmsir hafa gagnrýnt Ögmund fyrir myndbirtingu þar á meðal Ágúst Ólafur Ágústsson, varaformaður Samfylkingarinnar. Hann sagði að myndbirtingin væri fáránleg og barnaleg.

,,Málefnaleg gagnrýni er eðlilegasti hlutur í heimi. Stjórnmálamenn sem kveinka sér undan gagnrýni andstæðinga sinna eiga að hasla sér völl á öðrum vettvangi. Þessi framsetning Ögmundar dæmir sig hins vegar sjálf. Ef Ögmundur Jónasson vill líkja samferðamönnum sínum við fjöldamorðingja þá er það hans mál," segir Guðlaugur Þór í viðtali í Morgunblaðinu í dag.