Nýja húsnæðið að springa utan af Ikea

Hið nýja verslunarhúsnæði Ikea í Garðabæ er þegar orðið of lítið þrátt fyrir að hafa einungis verið tekið í notkun fyrir rúmu ári. Þórarinn Hjörtur Ævarsson framkvæmdastjóri segir að langtímaáætlun sem gerði ráð fyrir að ekki þyrfti að stækka verslunina fyrstu tvö til þrjú árin sé löngu úrelt. Nú sé húsnæðið að springa utan af þeim og þeir þurfi líklega að koma sér upp lagerhúsnæði annars staðar.

Þegar áætlanir um flutning og byggingu nýja hússins voru gerðar fyrir fjórum til fimm árum var sem dæmi ekki fyrirséð aukning á fjölda innflytjenda til landsins. „Við erum líklega ein af fyrstu stoppistöðum innflytjenda sem fjölmargir koma ekki með neitt nema ferðatöskur hingað til lands," segir hann.

Helstu umkvörtunarefni viðskiptavinanna eru að það það sé of lítið til. „Við erum kannski með 100 gáma niðrá höfn, en komum vörunni ekki inn í verslunina," segir Þórarinn og bætir við að það sé náttúrulega lúxusvandamál, en ömurlegt ástand engu að síður.

Nú þegar ekki verður hjá því komist að stækka verslunina verður langtímaáætlun gerð til ársins 2017 en gera má ráð fyrir að það verði margra ára ferli að fá leyfi. Verslunin er á mörkum Garðabæjar og Hafnarfjarðar og ekki búið að deiliskipuleggja hraunið sem verslunin er við.