Segir árás Jóns lítt dulbúna atlögu að Guðjóni Arnari

Kristinn H. Gunnarsson, þingflokksformaður Frjálslynda flokksins, segir að árás Jóns Magnússonar og stuðningsmanna hans á sig, sé lítt dulbúin atlaga að formanni flokksins sem miði að því að koma Jóni Magnússyni í formannssæti.

Það er nánast einsdæmi að miðstjórn í stjórnmálaflokki álykti gegn sitjandi þingmönnum eigin flokks eða forystu hans. Þetta gerðist hins vegar á miðstjórnarfundi Frjálslynda flokksins í Reykjavík á mánudag þegar Jón Magnússon, þingmaður flokksins, og stuðningsmenn hans fengu gegn vilja formanns flokksins, Guðjóns A Kristjánssonar, samþykkta ályktun sem segir að Kristinn H. Gunnarsson þingflokksformaður verði að láta af því embætti sínu.

Kristinn bauð átta flóttakonur og börn þeirra frá Írak nýlega velkomin til landsins á heimasíðu sinni og fjallaði þar almennt um að Íslendingar ættu að taka vel á móti flóttamönnum. En það er í andstöðu við málfluting Jóns Magnússonar og Magnúsar Þórs hafsteinssonar, varaformanns flokksins, sem hafa mælt gegn móttöku flóttamanna og almennt haft uppi viðhorf sem túlkuð eru fjandsamleg útlendingum í landinu.

Kristinn segir andstöðu Jóns Magnússonar og félaga vera lítt dulbúna atlögu að formanni flokksins. Það hafi byrjað með áskorun í síðustu viku á Sigurjón Þórðarson fyrrverandi þingmann flokksins um að bjóða sig fram gegn sitjandi formanni á næsta landsfundi. Hann eigi hins vegar enga möguleika á að ná kjöri en á bakvið þetta allt sé annar maður sem hugsi sér til hreyfings. Miðað við þennan framgang á miðstjórnarfundinum sýnist honum Jón Magnússon vera hershöfðinginn yfir þessu liði eins og Kristinn orðar það.

Kristinn man ekki eftir annarri eins atlögu að formanni flokks frá einum stofnana hans, og hefur þó verið í nokkrum flokkum.