Veislukostnaður á vegum borgarinnar nam 119 milljónum á þremur hálfu ári

Síðastliðin þrjú og hálft ár hafa opinberar móttökur á vegum borgarinnar kostað tæplega 119 milljónir króna. Þetta kemur fram í svari borgarstjóra við fyrirspurn Ólafs F. Magnússonar, borgarfulltrúa F-listans, sem lagt var fram í borgarráði í dag.

Ólafur spurði um ferða- og dagpeninga og veislu- og risnukostnað sérhvers borgarstjóra frá áramótum 2005 til dagsins í dag. Þau svör sem hann fékk voru á þá leið að í bókhaldi borgarinnar sé enginn liður sem heitir veislu- og risnukostnaður borgarstjóra. Kostnaður af öllum opinberum móttökum á vegum borgarinnar væri hins vegar tekinn saman undir tveimur kostnaðarliðum og samtals næmi sá kostnaður tæpum 119 milljónum króna á tímabilinu.

Árið 2005 nam þessi kostnaður 25,6 milljónum króna en þá var Steinunn Valdís Óskarsdóttir borgarstjóri. Árið 2006 reyndist kostnaðurinn 37,3 milljónir en þá voru Steinunn Valdís og Vilhjálmur Þ. Vilhjálmsson borgarstjórar, hvort í sex mánuði. Í fyrra var Vilhjálmur borgarstjóri í um níu mánuði en Dagur B. Eggertsson í þrjá. Kostnaður það árið reyndist 37 milljónir króna. Það sem af er þessu ári hafa þrír gengt embætti borgarstjóra, Dagur, Ólafur F. Magnússon og Hanna Birna Kristjánsdóttir. Veislukostnaður á vegum borgarinnar nemur nærri 19 milljónum króna það sem af er.

60 starfsmenn borgarinnar með yfir 700 þúsund krónur í laun

Ólafur spurði einnig um ferða- og dagpeningakostnað helstu embættismanna í fyrirtækjum borgarinnar eins og Orkuveitunni og Faxaflóahöfnum. Þau svör voru gefin að þær upplýsingar væru ekki í bókhaldi Reykjavíkurborgar en fyrirspurninni hefðu verið beint til viðkomandi fyrirtækja.

Þá spurði Ólafur einnig hversu margir einstaklingar hjá borginni væru með yfir 700 þúsund krónur í mánaðarlaun síðustu ár. Hefur þeim fjölgað úr 25 árið 2005 í 60 í ár sem eru með slíka upphæð í heildarlaun. Þar af eru 27 æðstu stjórnendur borgarinnar sem heyra undir kjaranefnd borgarinnar.