Skilti vegna vegfar-anda

Skilti hafa verið sett upp vegna ferða anda yfir frárein frá Vesturlandsvegi í Grafarholt. Endur með unga sækja í tjörnina eða regnvatnsmiðlunina, sem er inn í vegslaufunni og leggja við það líf sitt og unga sinna í hættu. Vegfar-endurnar gætu einnig fipað bílstjóra og því fyllsta ástæða til að draga úr hraða á þessum stað.

Í fréttatilkynningu frá Reykjavíkurborg segir að ,,ábending [hafi borist] í síðustu viku frá föður sem var þarna á ferð með börn sín og sagðist hann hafa séð dauðan unga. Framkvæmda- og eignasvið brást skjótt við og voru skiltin komin upp á föstudag. Eitt skilti er við fráreinina frá Vesturlandsvegi og hitt við samliggjandi aðrein frá Grafarholti.

Tilgangur skiltanna er að fá ökumenn til að aka hægar og anda léttar. Skiltin eru hin fyrstu sinnar tegundar í Reykjavík og bætast í fjölskrúðuga flóru, en í borginni eru yfir 18.000 umferðarskilti."

Skiltin nýju eru ekki einu aðgerðir vegna andalífs í borginni. Undir Hringbraut liggja andagöng frá Tjörninni yfir í Vatnsmýri, auk þess sem veggur var hlaðinn til að forða öndum frá því að ganga yfir Hringbrautina.