Um tuttugu milljónir söfnuðust fyrir HSÍ

Um tuttugu milljónir króna söfnuðust í söfnunarátaki sem stóð yfir samhliða þátttöku íslenska landsliðsins í handbolta á ólympíuleikunum í Peking.

Tvær safnanir voru í gangi á þessum tíma. Annars vegar fyrirtækjasöfnun, þar sem fyrirtæki voru hvött til þess að leggja HSÍ lið og hins vegar styrktarnúmer þar sem almenningur gat hringt í símanúmer og þannig styrkt sambandið.

Ásta Óskarsdóttir, gjaldkeri HSÍ sagði að nákvæmar tölur úr söfnunarátakinu lægju ekki fyrir en um 20 milljónir hefðu safnast.

Þessi upphæð bætist við þær 50 milljónir sem Þorgerður Katrín Gunnarsdóttir ákvað að veita til HSÍ í ljósi árangurs landsliðsins í handbolta.

HSÍ skilaði uppgjöri réttum megin við núllið í fyrsta skiptið í áraraðir í fyrra.