Utanríkisráðherra: Kemur til greina að opinbera hlutafjáreign þingmanna

Til stendur að setja siðareglur fyrir stjórnmálamenn og opinbera embættismenn á þessu kjörtímabili. Utanríkisráðherra segir koma til greina að hlutafjáreign þingmanna og ráðherra verði gerð opinber.

Veiðiferð þeirra Guðlaugs Þórs Þórðarsonar, Vilhjálms Vilhjálmssonar, Björns Inga Hrafnssonar og Hauks Leóssonar í Miðfjarðará hefur vakið um spurningar um siðareglur meðal stjórnmálamanna og opinberra embættismanna.

Ítrekað hefur verið bent á að slíkar siðareglur skorti og flutti Jóhanna Sigurðardóttir, félagsmálaráðherra, þingsályktunartillögu þess efnis í þrígang meðan hún var í stjórnarandstöðu. Ítarlegar reglur þess efnis eru við lýði í Bretlandi og í Bandaríkjunum en í Morgunblaðinu í dag kemur fram að ekki hafi enn verið útfært hvernig siðareglur verði settar fyrir stjórnsýslu ríkisins.

Í stefnuyfirlýsingu núverandi ríkisstjórnar kveður á að slíkar reglur verði settar og segir utanríkisráðherra koma til greina að þessar upplýsingar verði gerðar opinberar almenningi.