Vilhjálmur er ekki spilltur heldur bara "jolly good"

,,Af mínum kynnum af Vilhjálmi, þá hef ég ekkert nema allt gott um hann að segja" sagði Jón Magnússon, þingmaður Frjálslynda flokksins, þegar hann var spurður að þvi hvort Vilhjálmur Þ. Vilhjálmsson væri spilltur. Sömu spurningu svaraði Ellert B. Schram, þingmaður Samfylkingarinnar, ,,Nei nei, hann er bara svona jolly good. Það er engin spilling í þessu hjá honum".

Þeir Jón og Ellert, báðir fyrrverandi formenn SUS, voru gestir í morgunþætti Bylgjunnar, Í bítið, í morgun og ræddu þar meðal annars stöðu Sjálfstæðisflokksins í borginni. Ellert telur að Vilhjálmur hafi tekið rétta ákvörðun og segir ekki rétt að gera hann einan sökudólg í þessu máli. Allur borgarstjórnarflokkur Sjálfstæðisflokksins beri ábyrgðina, Vilhjálmur hafi gerst sekur um mistök sem hann hafi beðist afsökunar á.

Þá benti Jón á að Sjálfstæðisflokkurinn hafi venjulega varið mjög hart oddvita flokksins í borgarstjórn. Sú hafi ekki verið raunin núna og telur Jón þetta gjörbreytingu á flokknum þar sem hvorki forystumenn flokksins sé stofnanir hans hafi lagt í nokkra vörn fyrir Vilhjálm. Þvert á móti hafi verið vegið að honum innan flokksins í staðinn fyrir að kryfja málin til mergjar segir Jón sem telur óeðlilega hafi verið staðið að málum.

Jón furðar sig jafnframt á því hversu lítið ábyrgð stjórnenda REI og OR hefur verið í umræðunni og telur að þeir sem sátu í stjórn Orkuveitunnar og helstu forystumenn hennar, þegar þessar ákvarðanir voru teknar, beri allir ábyrgð.

Báðir lýsa þeir þó áhyggjum sínum vegna óvissunar sem nú ríkir um það hver komi til með að leiða flokkinn. Sú óvissa geti leitt til þess að menn verði upppteknir af því hver eigi að taka við í stað þess að menn einbeiti sér að málefnum borgarinnar. Sú hætta sé fyrir hendi að flokkurinn verði sundurtættur, að minnsta kosti næstu mánuðina.

Hér er hægt að hlusta á viðtalið í heild sinni: http://www.bylgjan.is/?PageID=1857