Hafði verið saknað í þrjá daga

Maðurinn sem fannst látinn í íbúð sinni við Skúlagötu í gærkvöld fannst ekki fyrr en vinir hans voru farnir að hafa áhyggjur af honum. Þeir höfðu þá ekki heyrt í manninum í þrjá daga. Þetta segir nágranni mannsins sem Vísir ræddi við í morgun.

Vinur mannsins ákvað því að hafa samband við lögreglu um kvöldmatarleytið í gær. Hann sagðist hafa áhyggjur af félaga sínum og bað lögreglu um að koma á svæðið. Lögreglan gerði það og tók lásasmið með sér.

Lásasmiðurinn opnaði íbúð mannsins fyrir lögreglunni og þá fannst maðurinn látinn inn í íbúðinni.

Höfuðáverkar voru á hinum látna og var sá sem hafði samband við lögreglu því færður upp á stöð til yfirheyrslu. Hann var í annarlegu ástandi og er beðið eftir því að það renni af honum svo hægt sé að taka af honum skýrslu.

Ekki er vitað hvort höfuðáverkarnir séu af mannavöldum en lögregla vill engu að síður ná tali af öðrum manni sem talinn er hafa verið gestur á heimili hins látna skömmu áður en hann lést.