Ingibjörg liggur undir feldi

Ingibjörg Guðmundsdóttir, formaður Landssambands íslenskra verzlunarmanna og varaforseti ASÍ, íhugar nú stöðu sína vegna komandi formannskjörs í ASÍ. Nýr formaður verður kosinn á ársfundi sambandsins í október. Stjórnir VR og LÍV skoruðu í dag á Ingibjörgu að bjóða sig fram til forseta Alþýðusambands Íslands.

„Ég ætla að gefa mér svona allavega nóttina til að hugsa þetta," sagði Ingibjörg þegar Vísir spurði hana að því hvernig hún ætlaði að bregðast við þessum áskorunum. „Ég er auðvitað búin að vera allt mitt líf í verkalýðsmálum og tek það auðvitað mjög alvarlega þegar baklandið skorar á mig," segir Ingibjörg jafnframt. Hún segist ekki vita nákvæmlega hversu mikinn stuðning hún hafi innan annarra aðildarfélaga ASÍ.