Vill láta kjósa um framtíð flugvallar í mars á næsta ári

Ólafur F. Magnússon, borgarfulltrúi Frjálslynda flokksins og fyrrverandi borgarstjóri, vill að kosið verði á ný í mars á næsta ári um framtíð Reykjavíkurflugvallar. Þá vill hann að allar upplýsingar um kostnað vegna kjörinna fulltrúa og embættismanna Reykjavíkurborgar og fyrirtækja í hennar eigu verði lagðar fram. Þessar tvær tillögur hyggst Ólafur leggja fram á fundi borgarstjórnar í dag.

Í tilkynningu frá Ólafi segir að markmiðið með endurteknum kosningum um flugvallarmálið sé að að ákvörðun um framtíð flugvallarins endurspegli vilja meirihluta borgarbúa. Bendir hann á að aðeins 37 prósent atkvæðisbærra borgarbúa hafi neytt atkvæðisréttar síns í kosningum um framtíð flugvallarins árið 2001. Þar af hafi 49 prósent flugvöllinn á brott en 48 prósent að hann yrði áfram í Vatnsmýrinni.

„Þannig byggja borgaryfirvöld í Reykjavík áætlanir um flutning Reykjavikurflugvallar á atkvæðum innan við 19% kosningabærra borgarbúa," segir í greinargerð með tillögunni. Það sé óverjandi að byggja áætlanir um flutning vallarins á svo litlu hlutfalli Reykvíkinga þegar það virðist ljóst að meirihluti borgarbúa og yfirgnæfandi meirihluti landsmanna sé á móti flutningi Reykjavíkurflugvallar til Keflavíkur.

Villandi umræða um launa- og ráðningarmál

Þá leggur Ólafur til að borgarstjórn samþykki að gerð sé grein fyrir heildarlaunagreiðslum, ferða- og dagpeningakostnaði, risnu- og veislukostnaði, símgreiðslum og öðrum kostnaði vegna borgarfulltrúa, varaborgarfulltrúa, helstu embættismanna borgarinnar, ásamt stjórnarmönnum, helstu embættismönnum og stjórnendum fyrirtækja í meirihlutaeigu Reykjavíkurborgar fyrir árin 2005-2008. Einnig sé birtur listi yfir þá einstaklinga hjá borginni og fyrirtækjum hennar sem hafa yfir 700 þúsund krónur í mánaðarleg heildarlaun árin 2005, 2006, 2007 og 2008. Jafnframt verði birtar upplýsingar um áðurgreindar greiðslur árlega héðan í frá.

Í greinargerð með tillögunni segir að í tíð fráfarandi meirihluta F-lista og Sjálfstæðisflokks hafi átt sér stað mjög villandi umræða um launa- og ráðningarmál, ferða- og dagpeningakostnað, risnu- og veislukostnað og annan kostnað vegna starfa kjörinna fulltrúa og embættismanna Reykjavíkurborgar og fyrirtækja í meirihlutaeigu hennar. Erfitt hafi reynst að fá samstöðu innan fráfarandi meirihluta um að opna þessi mál fyrir almenningi, sem sé hinn raunverulegi eigandi fyrirtækja borgarinnar og veiti kjörnum fulltrúum umboð til að starfa fyrir opnum tjöldum með hagsmuni almennings að leiðarljósi.

„Tillöguflytjandi telur að samþykkt þessarar tillögu geti aukið trúverðugleika borgarstjórnar og tekið af allan vafa um það að fyrirtæki í meirihlutaeigu Reykjavíkurborgar sæti sömu reglum og eftirliti og önnur starfsemi borgarinnar. Jafnframt verði ljóst hvaða öfl í borgarstjórn standi fyrir mestum kostnaði hjá borginni og þá þarf m.a. að athuga með slíkan kostnað hjá kjörnum fulltrúum í nefndum og ráðum borgarinnar, sem eru hvorki borgarfulltrúar né varaborgarfulltrúar," segir enn fremur í greinargerðinni.