Frávísunarmálflutningi í máli á hendur Jóni Ólafssyni frestað

Ákveðið var að fresta frávísunarmálflutningi í máli Ríkislögreglustjóra á hendur Jóni Ólafssyni athafnamanni og þremur öðrum þegar fyrirtaka var í málinu í dag.

Eins og fram hefur komið er Jón sakaður um að hafa skotið um 360 milljónum króna undan skatti á árunum 1999-2002 og hinir þrír, Hreggviður Jónsson, Ragnar Birgisson og Símon Ásgeir Gunnarsson, sem allir tengdust rekstri Norðurljósa og Íslenska útvarpsfélagsins, eru einnig sakaðir um brot á skattalögum.

Við fyrirtöku í málinu í Héraðsdómi Reykjavíkur í morgun voru lögð fram gögn í málinu og jafnframt ákveðið að fresta frávísunarmálflutningi sem fara átti fram 16. september. Það er vegna þess að Hæstiréttur á eftir að taka fyrir kröfu Jóns um að bæði Ragnar Aðalsteinsson og Sigurður G. Guðjónsson verði verjendur hans. Héraðsdómur hafnaði í júlí þeirri kröfu að Sigurður yrði verjandi Jóns en saksóknari hafði bent á að Sigurður yrði hugsanlega kallaður til sem vitni í málinu.

Þann 16. september verður því svokallað milliþinghald í málinu þar sem staða málsins verður metin og saksóknari og verjendur geta lagt fram gögn.