Davíð vildi ekki ljóð eftir Matthías Johannessen

Vegna óánægju með leiðaraskrif Morgunblaðsins um vígslu Ráðhúss Reykjavíkur lét Davíð Oddsson skipta út gluggarúðu í Ráðhúsinu með ljóði eftir Matthías Johannessen þáverandi ritstjóra Morgunblaðsins.

Matthías Johannessen birtir dagbókarfærslu frá 1995 á heimasíðu sinni að Davíð Oddsson þáverandi forsætisráðherra hafi sagt við sig í nýársveislu að honum hefði sárnað leiðaraskrif Morgunblaðsins þegar Ráðhúsið var tekið í notkun árið 1992.

Leiðari Morgunblaðsins gagnrýndi veisluhöld við vígslu Ráðhússins og sagði að það hefði átt að opna strax upp á gátt fyrir almenning, en ekki neina útvalda.

Matthías skrifar: Nú sagði hann mér að hann hefði látið skipta rúðunni út , þegar leiðarinn birtist og látið setja nýtt gler í gluggann, óskrifað gler. Eins og óskrifað blað er þessi gluggi enn í dag!



Davíð hafði ætlað að setja ljóðið Vorið eftir Matthías á rúðu í Ráðhúsinu eins og gert hefur verið með ljóð Tómasar Guðmundssonar.

Matthías segir í færslunni að leiðari Morgunblaðsins hefði ekki breyst þrátt fyrir fyrirætlan Davíðs enda hafi hann verið í samræmi við fyrri afstöðu blaðsins.