Indverskur gúru vill messa við setningu Alþingis

Indverskur trúarleiðtogi, Rajan Zed að nafni, hefur óskað eftir því að hann fái að fara með bænir úr fornum trúarritum Hindúa fyrir setningu Alþingis þann 1. október næstkomandi. Frá þessu er greint á vefmiðlinum merinews.com. Þar er sagt frá því að Zed hafi borist svar við fyrirspurn sinni frá Þorsteini Magnússyni, aðstoðarskrifstofustjóra Alþingis, þar sem beiðninni er hafnað.

Þorsteinn segist kannast við málið í samtali við Vísi en að fyrirspurnin hafi fyrst borist í fyrra. „Hann hafði samband fyrir ári síðan og spurði hvort það kæmi til greina að vera með einskonar messu fyrir þingsetninguna. Þeirri beiðni var hafnað og hann var að ítreka þetta núna en ég er nú ekki búinn að svara honum," segir Þorsteinn. Hann segir hinsvegar ekki standa til að gera breytingar á athöfninni sem hefur verið með nokkurnveginn óbreyttu sniði frá árinu 1845.

Þegar Zed Rajan er slegið upp í alfræðisafninu Wikipedia kemur í ljós að hann hefur sóst nokkuð eftir því að fara með hindúabænir á ríkisþingunum í Bandaríkjunum og hefur hann fengið sínu framgengt í Nevada, Kalíforníu og Núju Mexíkó og fleiri ríkjum. Einnig hefur hann fengið að messa í öldungadeild Bandaríkjaþings.

Zed Rajan var einnig í fararbroddi í sumar þegar trúarleiðtogar úr hópi Hindúa börðust fyrir því að grínmyndin "The Love Guru" yrði sniðgengin í bíóhúsum vestanhafs.

Fréttina á merinews.com má sjá hér.