Áhersla lögð á að greiða laun

Slæm staða Árvakurs, Útgáfufélags Morgunblaðsins, var rædd á starfsmannafundi nú seinni partinn. Þar kom meðal annars fram að lausafjárerfiðleikar væru að gera félaginu erfitt fyrir. Áhersla væri þó lögð á að greiða laun starfsmanna.

Líkt og fram kom í frétt Vísis fyrr í dag fundaði stjórn Árvakurs með lögfræðingum sínum í morgun. Samkvæmt heimildum Vísis er fjárhagsstaða félagsins verulega slæm en fundað verður með Glitnismönnum, sem er langstærsti lánadrottinn fyrirtækisins, á sunnudag.

Á starfsmannafundinum kom einnig fram að staðan væri alvarleg en áfram skal haldið. Vonast er til þess að staðan verði betri eftir helgi, þegar fundi með lánadrottnum er lokið.