Samið um læknisverk á Akureyri

Saminganefnd heilbrigðisráðherra og Sjúkrahúsið á Akureyri hafa gert fjóra samninga um læknisverk. Tveir þeirra eiga að eyða biðlistum eftir aðgerðum.

Í tilkynningu frá heilbrigðisráðuneytinu kemur fram að um sé að ræða liðskiptaaðgerðir, krossbandaaðgerðir, sérfræðiþjónustu í efnaskipta- og innkirtlalækningum og um sérfræðiþjónustu í taugalækningum.

Stefnt er að því að eyða biðlistum eftir liðskipta- og krossbandaaðgerðum. 130 manns bíða nú eftir liðskiptiaðgerðum á þjónustusvæði sjúkrahússins á Akureyri og er vonast til að biðlistanum verði eytt innan tveggja ára. Samningurinn um krossbandaaðgerðir er einnig til tveggja ára og er stefnt að því að gera allt að hundrað aðgerðir á þeim tíma en sjúklingar á þjónustusvæði sjúkrahússins hafa hingað til þurft að leita til Reykjavíkur vegna þessara aðgerða.