Geir Haarde: Farið varlega!

„Farið varlega í lántökur! Ekki steypa ykkur í skuldir sem þið ráðið ekki við," sagði Geir Haarde forsætisráðherra í hádegisviðtalinu á Stöð 2. Þar var hann spurður að því hvaða skilaboð hann hefði til ungs fólks með mikil lán vegna íbúðarkaupa. Hann segist hafa varað fólk við því að fjármagna sig með því að taka lán í erlendri mynt. Geir segir góðar líkur á því að verðbólguskotið verði bara nokkrir mánuðir. Um leið og það stöðvist geti bankarnir farið að lækka vextina.

Geir segir að ástandið í efnahagslífinu hér stafi að mestu leyti af aðstæðum á alþjóðamörkuðum og nefndi hátt heimsmarkaðsverð á olíu sérstaklega sem dæmi. Geir hafnar því að ríkisstjórnin hafi staðið aðgerðarlaus. Hann bendir á að ríkissjóði hafi verið sparaðir miklir peningar því ekki hafið verið hlaupið til eftir peningum á alþjóðamörkuðum fyrir tveimur mánuðum þegar vextir voru mun hærri en þeir eru nú.