Skoða tengsl bruna í bryggjuhverfi

Enginn hefur verið kallaður til yfirheyrslu vegna bílabrunans á Naustabryggju þegar kveikt var í Volkwagen Touareg á dögunum. Möguleiki er á því að tengsl séu á milli atviksins og annars bruna á sömu slóðum aðfaranótt laugardagsins síðasta en þá kviknaði í tveimur hjólhýsum.

Sigurbjörn Víðir Eggertsson, hjá lögreglunni á höfuðborgarsvæðinu fer með rannsókn málsins. Hann segir að erfitt geti reynst að sanna sök í málinu þrátt fyrir að ábending berist um hver hafi staðið að brunanum, en Benjamín Þór Þorgrímsson, eigandi bílsins hefur boðið hálfa milljón króna til handa þeim sem getur bent á hver hafi verið að verki.

Sigurbjörn segir að verið sé að kanna hvort tengsl séu á milli brunanna enda hafi þeir verið á sömu slóðum. Hann sagðist þó ekki vita hver niðurstaða rannsóknar á hjólhýsabrunanum sé og því sé ekki ljóst hvort sá eldur hafi blossað upp af mannavöldum. Öruggt er hins vegar talið að kveikt hafi verið í Touareg jeppanum.