Borgar sig aldrei að gefast upp

„Ég get ekki sagt annað en að ég sé afar glaður yfir þessum fréttum enda liðin tæplega 3 ár síðan ég byrjaði að beita mér fyrir þessum málum," segir Ólafur F. Magnússon, forseti borgarstjórnar, þegar hann er spurður hvað honum finnist um ákvörðun Húsafriðunarnefndar um að beina því til menntamálaráðherra að húsin við Laugaveg 4 og 6 verði friðuð.

Fyrir þremur árum blasti við sú staðreynd rífa mátti 38 af 74 húsum við Laugaveg byggð fyrir 1918 og þar af var leyfi til að rífa 9 af 13 nítjándu aldar byggingum við götuna. Ólafur segir því mikið gleðiefni að nú hafi tekist að bjarga tveimur húsum frá 19. öld en annað húsið er á meðal elstu verslunarhúsa í borginni.

„Það er ákaflega dýrmætt að viðhalda samhengi götumyndarinnar á þessum stað sem markar upphaf Laugavegarins í tvíþættum skilningi," segir Ólafur og bætir því við að hann vonist eftir því að húsin verði í framhaldinu endurreist í upphaflegri mynd. „Það á eftir að koma í ljós hver gerir það en ég hef ávallt verið ófeiminn við að segja að borgaryfirvöld eigi að koma að því. Við sem höfum barist fyrir þessum málstað teljum að það sé mikið á sig leggjandi til að varðveita götumynd af þessu tagi," segir hann.

Ólafur segir að þetta mál sýni að það borgi sig aldrei að gefast upp. „Baráttan virtist töpuð fyrir nokkrum dögum og ég var rödd hrópandans í eyðimörkinni," segir hann. „Þetta mál sýnir einnig hve mikil breyting hefur orðið í þessum málum innan borgarstjórnar og ekki síður utan hennar." Aðspurður hvort málið hafi verið orðið að miklu hitamáli innan borgarstjórnarmeirihlutans segir Ólafur: „Ég hef nú alltaf látið þetta mál brenna á mér en ég hef barist mjög málefnalega fyrir mínum hugsjónum í þessu máli og hef hvorki verið með hótanir né einkunargjafir í garð annara"

Sé smellt á hlekkinn hér að neðan má lesa samþykkt Húsafriðunarnefndar.