Fundu 250 grömm af kókaíni

Lögreglan á höfuðborgarsvæðinu lagði í gær hald á um 250 grömm af kókaíni í íbúð í miðborginni.

Þrír karlar, tveir á fimmtugsaldri og einn á fertugsaldri, voru í íbúðinni þegar lögreglan kom þangað til húsleitar og voru þeir allir handteknir. Kókaínið var ætlað til sölu eftir því sem segir í tilkynningu lögreglu.

Þá stöðvaði lögreglan einnig í gær karlmann á sextugsaldri með um 15 grömm af fíkniefnum í fórum sínum, mestmegnis amfetamín. Í vesturbæ Reykjavíkur voru enn fremur höfð afskipti af karli á líkum aldri en sá hafði meðferðis ámóta magn af fíkniefnum og var sömuleiðis aðallega um afmetamín að ræða.

Þá voru tveir karlar teknir í Árbænum með hass og amfetamín í bíl sínum, samanlagt um 35 grömm. Þá fannst lítilræði af amfetamíni í húsi í Kópavogi. Aðgerðir lögreglu í gær eru liður í að hamla gegn sölu og dreifingu fíkniefna en við þær naut lögreglan á höfuðborgarsvæðinu liðsinnis lögreglumanna frá Norðurlandi. Lögreglan minnir á fíkniefnasímann 800-5005.